Mae'r gwasanaeth coetsys newydd, sy'n cysylltu trefi allweddol yng ngogledd a de-orllewin Cymru, wedi dechrau gweithredu.

Gwnaeth Taith Cymru ei thaith gyntaf erioed rhwng Bangor a Chaerfyrddin ddydd Sul.

Bydd yn rhedeg deg gwasanaeth rheolaidd o ddydd Llun i ddydd Sadwrn, ynghyd ag amserlen debyg ar ddyddiau Sul, gan alw yng Nghaernarfon, Porthmadog, Dolgellau, Machynlleth, Aberystwyth, ac yn ddiweddarach, Aberaeron.

Mae gwasanaeth newydd Trafnidiaeth Cymru (TrC), sy'n cael ei redeg gan y cwmnïau Edwards Coaches a Llew Jones, yn bwriadu lleihau amseroedd teithio o fwy nag awr.

Bydd estyniad hwyr i'r gwasanaeth hefyd, gydag un daith bob dydd rhwng Bangor a gorsaf reilffordd Caergybi a Phorthladd Caergybi, gan wella cysylltiadau â gwasanaethau rheilffyrdd a fferi.

Dywedodd Mark Hooper, y dirpwy weinidog dros drafnidiaeth: "Mae TaithCymru yn gam sylweddol ymlaen wrth gysylltu cymunedau ar draws Gogledd a De-orllewin Cymru."

"O ddydd Sul yma, bydd pobl yn gallu teithio rhwng Bangor a Chaerfyrddin yn gyflymach ac yn haws nag erioed o'r blaen, gyda choetsys cyfforddus, modern yn galw mewn trefi allweddol ar hyd y ffordd."

"Mae'r gwasanaeth newydd hwn yn rhan o'n huchelgais ehangach i adeiladu rhwydwaith trafnidiaeth gyhoeddus fwy integredig ledled Cymru, gan gysylltu gwasanaethau bysiau a rheilffyrdd, annog pobl i beidio â defnyddio eu ceir ar gyfer pob taith, a chefnogi ein nodau twristiaeth gynaliadwy a datgarboneiddio."

"Byddwn yn annog unrhyw un sy'n teithio rhwng Gogledd a De-orllewin Cymru i archebu eu tocynnau nawr a rhoi cynnig ar y gwasanaeth newydd sbon hwn."

Mae dros £2 filiwn yn cael ei wario ar flwyddyn gyntaf gweithrediadau TaithCymru, gan gynnwys prynu wyth bws newydd a system archebu ar-lein; disgwylir i bob taith bara rhwng 4 awr a 45 munud a phum awr.

Mae'r coetsys newydd wedi'u dylunio i ddarparu taith gyfforddus, gyda Wi-Fi, seddi mynd yn ôl, aerdymheru a chyfleusterau toiledau.

Mae'r gwasanaeth yn hygyrch, gyda modd o archebu lle ar gyfer cadair olwyn, ac mae darpariaeth ar gyfer beicwyr hefyd gyda hyn a hyn o leoedd ar gyfer beiciau y gellir eu harchebu ar-lein.

Mae modd archebu tocynnau ar-lein hyd at 15 munud cyn yr amser teithio ac mae'r prisiau'n gyson ac yn fforddiadwy, gyda thaith arferol o Fangor i Gaerfyrddin yn costio £10 i un oedolyn.

Dywedodd Lee Robinson, cyfarwyddwr trafnidiaeth rhanbarthol TrC: "Mae TaithCymru yn ychwanegiad cyffrous newydd i rwydwaith trafnidiaeth gyhoeddus Cymru, gan ddarparu ffordd gyflymach, fwy cyfforddus a fforddiadwy o deithio rhwng cymunedau ar draws Gogledd a De-orllewin Cymru."

"Mae'r gwasanaeth wedi'i gynllunio o amgylch anghenion teithwyr, gyda bysiau modern, system archebu ar-lein syml a gwell cysylltiadau â gwasanaethau rheilffyrdd, a gwasanaethau bysiau a llongau fferi lleol ar hyd y llwybr."

"Drwy ei gwneud hi'n haws i bobl adael y car gartref, bydd TaithCymru yn rhoi mwy o fynediad at swyddi, addysg, gwasanaethau a chyrchfannau i ymwelwyr, gan gefnogi ein huchelgais ar gyfer rhwydwaith trafnidiaeth mwy cydgysylltiedig a chynaliadwy ledled Cymru."