Mae cyn-bennaeth Ysgol Friars yn treulio dedfryd o 17 mlynedd yn y carchar am gam-drin pedair merch yn rhywiol rhwng 2019 a 2023.

Daeth adolygiad annibynnol i’r casgliad fod dros 50 o gyfleoedd wedi eu colli i atal y prifathro rhag ymosod yn rhywiol ar ferched.

Bydd y ddrama dair-rhan, o dan y teitl gweithredol 'Y Pennaeth', yn cael ei darlledu y flwyddyn nesaf gyda'r actor Mark Lewis Jones yn chwarae rhan Foden.

Yn ôl y darlledwr, mae'r ddrama wedi'i datblygu dros y 18 mis diwethaf a bydd yn seiliedig ar dystiolaeth a nodiadau o’r achos cyfreithiol yn Llys y Goron yr Wyddgrug, ac ar adroddiad 'Cyfiawnder Trwy Ein Dewrder' gan yr arbenigwraig Jan Pickles.

Bydd y gyfres yn adrodd yr hanes o safbwynt dwy ferch ifanc sy’n cael eu cam-drin. Bydd y cymeriadau hyn, a nifer o’r golygfeydd, yn ffuglennol er mwyn diogelu goroeswyr yr achos gwreiddiol.

Dyweddod Gwenllian Gravelle, comisiynydd drama S4C: "Mae hon yn stori bwysig ac ysgytwol am sut y llwyddodd dyn mewn safle o rym ac ymddiriedaeth i fradychu’r statws hwnnw dros nifer o flynyddoedd, tra’n codi cwestiynau anodd am ddiwylliannau lle mae unigolion yn cael eu gweld fel rhai na ellir eu herio."

"Wedi’i datblygu gyda gofal a sensitifrwydd mawr, mae’r cynhyrchiad yn ymdrin â’r pwnc yn gyfrifol, gan ganolbwyntio ar ganlyniadau ehangach brad gan ffigwr cyhoeddus a ymddiriedwyd â chyfrifoldeb a gofal."

Bydd y gyfres yn cael ei chynhyrchu gan y cwmni cynhyrchu annibynnol MOJO gyda Huw Chiswell yn cyfarwyddo a Llyr Morus yn cynhyrchu. Llinos Gerallt yw awdur y ddrama.

Bydd hefyd yn archwilio sut y gwnaeth Foden fanteisio ar sefyllfaoedd personol y merched, yn ogystal â methiannau’r gweithdrefnau diogelu, a’r cyfleoedd a gollwyd i atal troseddau pellach. 

Ychwanegodd llefarydd ar ran y sianel: "Yn ystod y broses o ymchwilio ac ysgrifennu, mae’r awdur a’r cwmni cynhyrchu hefyd yn cydweithio â newyddiadurwr, sydd yn bwynt cyswllt rhyngddynt â rhai oedd ynghlwm â’r hyn ddigwyddodd, neu wedi eu heffeithio gan y digwyddiadau."

"Yn ystod y cyfnod datblygu, ac fel mater o gwrteisi, mae’r cwmni cynhyrchu hefyd wedi bod mewn cysylltiad â Heddlu Gogledd Cymru."

"Mae'r heddlu wedi sicrhau bod holl oroeswyr yr achos llys yn ymwybodol o'r prosiect, ac mae'r cwmni cynhyrchu wedi cynnig mynediad at gefnogaeth broffesiynol iddynt."