Mae pedoffil a ymosododd yn rhywiol ar ferch ym Mhwllheli ar ôl meithrin perthynas amhriodol wedi cael ei garcharu am 14 mlynedd.

Plediodd Alexander Sands yn euog i gyfarfod â merch 13 oed ac ymosod trwy dreiddiad yn dilyn cyfres o ddigwyddiadau yn 2022.

Cyfaddefodd hefyd iddo geisio cwrdd â phlentyn wyth oed yn dilyn paratoi rhywiol, a ddigwyddodd yn ardal Swydd Gaerlŷr y llynedd.

Cafodd ei ddisgrifio gan dditectif o Heddlu Gogledd Cymru fel "perygl i blant".

Cysylltodd Sands â'r dioddefwr cyntaf a’i ffrind trwy gêm fideo ar-lein, lle dywedodd Sands wrthynt ei fod yn 16 oed. Roedd yn 29 oed mewn gwirionedd.

Gofynnodd i'r dioddefwr am ei manylion cyfryngau cymdeithasol, ond gwrthododd.

Ar achlysur arall pan oedd y dioddefwr yn chwarae gêm fideo gyda'i ffrind, dywedodd Sands wrthi ei fod yn dod i ymweld â hi dros y penwythnos, er nad oedd hi erioed wedi dweud wrtho ble roedd hi'n byw.

Y diwrnod canlynol, ymddangosodd yn ardal Pwllheli a dod o hyd i'r dioddefwr yn eistedd ar fainc gyda'i ffrindiau.

Pan wrthododd y dioddefwr ei gais i'w chofleidio, gwthiodd un o'i ffrindiau oddi ar y fainc ac eisteddodd wrth ei ymyl, lle gorfododd ei hun arni a'i chusanu.

Yna ceisiodd roi ei ddwylo i lawr ei throwsus, cyn ymosod arni'n rhywiol.

Yn Llys y Goron Yr Wyddgrug ddydd Gwener, cafodd Sands, sydd heb gartref sefydlog ond sydd yn dod o ardal Preston, eu garcharu am 10 mlynedd yn y carchar gyda chyfnod trwydded estynedig o bedair blynedd.

Dywedodd y Ditectif Rhigyll Jamie Aston: "Mae Alexander Sands yn berygl i blant a defnyddiodd blatfform ar-lein i dargedu ei ddioddefwr i ddiwallu ei ddymuniadau rhywiol.

"Mae'r achos hwn yn tynnu sylw at ba mor bwysig yw hi i blant a'u rhieni wybod yn union â phwy maen nhw'n siarad ar-lein.

"Rwy'n canmol dewrder y dioddefwyr yn yr achos hwn am fod â'r hyder i ddod ymlaen ac i adrodd eu hanesion, gan arwain at ddedfryd hir i Sands o dan glo lle na all achosi niwed mwyach.

"Rydym yn annog pawb sydd wedi dioddef ymosodiad rhywiol i ddod ymlaen gyda'r hyder y byddant yn cael eu clywed a'u cefnogi.

"Ni fydd trais yn erbyn merched a genethod yn cael ei oddef ac mae'n parhau i fod yn brif flaenoriaeth i Heddlu Gogledd Cymru. Byddwn yn parhau i fynd ar drywydd y rhai sy'n gyfrifol ac yn dod â nhw o flaen ei gwell."

Plediodd Sands yn euog hefyd i geisio cwrdd â phlentyn wyth oed ar ôl paratoi rhywiol, yn dilyn ymchwiliad ar wahân gan Heddlu Swydd Gaerhirfryn.

Rhoddwyd gorchmynion atal oes iddo i amddiffyn y ddau ddioddefwr ac mae'n rhaid iddo gofrestru fel troseddwr rhyw am oes ac fe'i wnaed hefyd yn destun Gorchymyn Atal Niwed Rhywiol (SHPO) am 12 mlynedd.