Plediodd Jason Thomas yn euog i ymoosd, ymddygiad rheolaethol a gorfodol ac aflonyddu gan achosi ofn trais yn barod.

Clywodd Llys y Goron yr Wyddgrug fod Thomas, 36 oed, wedi ceisio rheoli ei bartner yn ystod eu perthynas gamdriniol dros bedair blynedd.

Mi roddodd declyn tracio yn ei char heb iddi wybod, ei chyhuddo hi ar gam ei bod hi’n cael perthynas efo rhywun arall, edrych drwy ei ffôn heb ei chaniatâd a’i galw hi’n enwau cas.

Ym mis Mehefin 2025, mi ddaeth eu perthynas i ben, ond mi barhaodd Thomas aflonyddu ami hi. Mi wnaeth hi atal ei rif ffôn, ond mi barhaodd o gysylltu efo hi.

Dau fis ar ôl diwedd y berthynas, mi ymosododd o arni hi drwy ei dyrnu hi sawl gwaith yn ei hwyneb a’i chorff, gan achosi cleisio poenus.

Yna, mi anfonodd lun can petrol ati hi a bygwth ei llosgi hi, gan achosi iddi hi ofni am ei bywyd hi.

Ddydd Gwener diwethaf, cafodd Thomas ei ddedfrydu i dair blynedd a phedwar mis yn y carchar.

Mi dderbyniodd hefyd Orchymyn Gwarchod Cam-drin Domestig am ddeng mlynedd, sy’n ei wahardd rhag cysylltu efo’r dioddefwr.

Dywedodd Ditectif Arolygydd Chris Burrow o Heddlu Gogledd Cymru: "Mi gafodd ymddygiad Thomas tuag at ei gyn gymar effaith drychinebus ar ei iechyd meddwl a’i lles hi."

"Ni ddylai unrhyw un byth deimlo’n anniogel yn eu cartref nhw, yn enwedig wrth law rhywun sy’n dewis defnyddio trais ac ofn."

"Dwi’n canmol y dioddefwr am ei dewrder hi wrth ddod atom ni, a dwi’n gobeithio nad ydy hi rŵan yn byw mewn ofn ei fod o’n mynd i achosi niwed iddi hi a’i theulu hi."

"Yn unol â’n blaenoriaethau heddlu ni, ‘da ni’n gwbl ymroddgar gwarchod dioddefwyr cam-drin domestig a dod â throseddwyr o flaen eu gwell."

"’Da ni’n annog unrhyw un sy’n dioddef cam-drin, neu’n pryderu am les rhywun arall, i gysylltu efo ni. Mi wnawn ni wrando, mi wnawn ni helpu ac mi wnawn ni weithredu."