Mae'r estyniad newydd i lwybr cerdded Cob Crwn ym Mhortmadog wedi'i agor i'r cyhoedd.

Mae cyllid gan lywodraethau'r DU a Chymru wedi'i wario ar wella cyfleusterau hamdden a hygyrch yng nghanol y dref fel rhan o gynllun adfywio ehangach.

Yn ôl Cyngor Gwynedd, bydd angen peth gwaith yn y wythnosau nesaf i gwblhau'r prosiect, sy'n edrych dros Afon Glaslyn a Llyn Bach.

Dyweddod arweinydd y cyngor, Nia Jeffreys, sydd hefyd yn aelod lleol dros Dwyrain Porthmadog: "Mae’r ardal hon yn ardal bwysig i drigolion Porthmadog ac mae’r gwelliannau yn rhoi cyfle i fwy o bobl fwynhau’r ardal."

"Mae’n galonogol gweld buddsoddiad yn ein tref yn arwain at welliannau  ymarferol i’r gymuned, ac yn cyfrannu at y gwaith o adfywio’r dref."

"Mae bwriad i gynnal agoriad swyddogol i ddathlu’r gwaith a dwi’n annog pobl leol fyddai’n dymuno mynychu i gadw golwg am fwy o fanylion fydd yn cael eu cyhoeddi yn fuan."

Mae estyniad Cob Crwn wedi cael ei ariannu drwy raglen Trawsnewid Trefi gan Llywodraeth Cymru a Chronfa Ffyniant Gyffredin y DU ac fe’i datblygwyd a’i wireddu ar y cyd gan Adran Economi, Amgylchedd a YGC Cyngor Gwynedd.

Mae'r cyngor hefyd yn cynnal ymgynghoriad cyhoeddus ar sut i wella cysylltiadau teithio llesol ar draws Gwynedd ar gyfer cerdded, beicio ac yn defnyddio cadair olwyn.

Ychwanegodd y Cynghorydd R. Medwyn Hughes, aelod y cabinet dros y gymuned: "Mae’n wych gweld y llwybr bellach ar agor ac ar gael i’r gymuned."

"Mae buddsoddi mewn mannau cyhoeddus, gwella cysylltiadau a chreu cyfleoedd i bobl gerdded a beicio yn rhan bwysig o wneud ein trefi yn lleoedd deniadol a hygyrch i fyw, gweithio ac ymweld."