Bangor: cyllid ynni ar gyfer canolfan rhoi gwaed

Tuesday, 20 October 2026 at 14:44

By Ystafell Newyddion MônFM

Bydd canolfan rhoi gwaed ym Mangor yn derbyn cyllid gan Lywodraeth Cymru i leihau ei chostau ynni.

Bydd Ymddiriedolaeth GIG Prifysgol Felindre yn derbyn cyfran o dros £500,000 i wella effeithlonrwydd ynni mewn dau safle sy'n perthyn i Wasanaeth Gwaed Cymru yn y Gogledd.

Bydd y cyllid yn cael ei ddefnyddio i osod paneli solar, batris, pympiau gwres a mannau gwefru cerbydau trydan, gan helpu i wella effeithlonrwydd, gwydnwch a chynaliadwyedd y ddau safle ym Mangor a Wrecsam.

Yn ôl Llywodraeth Cymru, bydd y grant yn helpu i gefnogi'r broses o drosglwyddo Gwasanaeth Gwaed Cymru i gerbydau trydan a'i gyfraniad at targedau sero net GIG.

Dim ond dau brosiect yn y Gogledd fydd yn derbyn cyfran o fwy nag £8.2 miliwn o drydedd rownd cyllid Ynni Cymru, sydd â'r nod o leihau costau ynni a thorri allyriadau carbon.

Dywedodd y Gweinidog Ynni, Adam Price: "Mae'r prosiectau hyn yn dangos sut y gall ynni glân gefnogi'r gwasanaethau y mae pobl yn dibynnu arnynt bob dydd. Boed hynny'n helpu myfyrwyr i ddatblygu'r sgiliau fydd eu hangen arnynt yn y gweithle yn y dyfodol neu'n cefnogi gwasanaeth iechyd sy'n gwneud cyfraniad hanfodol at ofal cleifion ledled Cymru."

"Mae Ynni Cymru yn gwireddu gweledigaeth Llywodraeth Cymru o sicrhau ynni glanach a rhatach, sy'n cael ei berchnogi a'i ddefnyddio gan bobl a chymunedau ledled Cymru."